मराठवाड्यात कोरोनाचा कहर;रुग्ण संख्या वाढत चालली


औरंगाबाद/प्रतिनिधी
मराठवाड्यात सर्वत्र करोनाच्या रुग्णाची संख्या दिवसेंदिवस वाढत चालली आहे. नांदेडमध्ये गुरुवारी रात्री एका ७८ वर्षीय वृद्धाचा मृत्यू झाला, तर सहा नव्या रुग्णांची नोंद झाली. जालन्यात नव्याने सात तर लातूरमध्ये दोन करोनाग्रस्तांची भर पडली.

नांदेडमध्ये करोनाचा सहावा बळी

नांदेड : जिल्ह्यात गुरुवारी रात्री एका ७८ वर्षीय वृद्धाचा मृत्यू झाला. तर सहा नव्या रुग्णांची नोंद झाली. मृतांची संख्या सहा झाली असून शुक्रवारी ११ जणांना रुग्णालयातून सुट्टी मिळाली.

गुरुवारी रात्री ८७ जणांचे अहवाल प्राप्त झाले. त्यात सहा जणांना करोनाची लागण झाल्याचे निष्पन्न झाले. लोहारगल्ली परिसरातील एका दाम्पत्य दोन दिवसांपूर्वी श्वसनाचा त्रास होत असल्याने शासकीय रुग्णालयात दाखल झाले होते. या दोघांवरही उपचार सुरू होते. पण ७८ वर्षीय वृद्धाने अखेरचा श्वास घेतला. त्याच्या पत्नीची प्रकृतीही चिंताजनक असल्याचे सांगण्यात आले. आतापर्यंत ११६ जणांचे अहवाल पॉझिटिव्ह आले असून सहा जणांचा मृत्यू झाला. तर ५२ जणांना उपचारानंतर घरी पाठविण्यात आले. सध्या ५६ जणांवर जिल्ह्यातील विविध रुग्णालयात उपचार सुरु आहेत.

गेल्या साठ दिवसांपासून बंद असलेली एसटी महामंडळाची सेवा शुक्रवारी सुरू झाली. जिल्हांतर्गत वेगवेगळ्या रस्त्यांवरून २२ बस धावल्या. एसटी पाठोपाठ १ जूनपासून रेल्वे सेवा सुरू होणार आहे. नांदेड विभागातून सचखंड एक्स्प्रेस नियोजित वेळापत्रकानुसार धावणार असून त्यासाठी नांदेड, पूर्णा, परभणी, सेलू, जालना व औरंगाबाद या स्थानकावरुन तिकीट आरक्षण करता येणार आहे.

जालन्यात आढळले सात पॉझिटिव्ह

जालना : करोनाच्या नव्या सात रुग्णांची शुक्रवारी भर पडल्याने रूग्ण संख्या ५१ झाली आहे. बुधवारी जिल्ह्यातील एकूण १३७ संशयितांच्या लाळेचे नमुने तपासणीसाठी पाठविले होते.

जुना जालना भागातील एका खासगी रुग्णालयातील चार कर्मचारी, नवीन जालन्यातील खासगी रुग्णालयातील एक, भोकरदन येथील एक जवान आणि मंठा तालुक्यातील पेवा येथील पॉझिटिव्ह रुग्णाच्या संपर्कात आलेला एक जण असे एकूण सात जणांचा अहवाल पॉझिटिव्ह आला आहे. दरम्यान, शुक्रवारी शहरातील सर्व दुकाने उघडण्यात आल्याने बाजारपेठेत नागरिकांनी मोठी गर्दी केली होती. नवीन जालन्यातील काद्राबाद नेहरू रोड, हुतात्मा श्रद्धानंद चौक, मोती मशिद परिसर, वीर सावरकर चौक, सिंधी बाजार, हुतात्मा जनार्दन मामा चौक, अर्जुन खोतकर बिझनेस सेंटर, जुन्या जालन्यात गांधी चमन, बाजार चौकी भागात बाजारपेठ उघडण्यापूर्वी नागरिकांनी गर्दी केली होती. त्यामुळे वाहतूक विस्कळीत झाली होती.

लातूरमध्ये आढळले दोन करोनाग्रस्त

लातूर : जिल्ह्यातील दोन जणांचे अवहाल पॉझिटिव्ह आले आहेत. शुक्रवारी तपासणीसाठी ९५ जणांचे स्वॅब पाठविण्यात आले होते, त्यापैकी दोन जणांचे पॉझिटिव्ह, ८७ जणांचे निगेटिव्ह तर सहा जणांचे अवहाल प्रलंबित आहेत. लेबर कॉलनी परिसरातील एकाला करोनाची लागण झाल्याचे निष्पन्न झाल्यानंतर हा परिसर महापालिकेने प्रतिबंधीत क्षेत्र म्हणून घोषीत केला. या परिसरातील २०० कुटुंबांना लागणाऱ्या जीवनावश्यक वस्तु उपलब्ध करून देण्यासाठी एक टास्क फोर्स उपायुक्त सुंदर बोंदर यांच्या नेतृत्वाखाली तयार करण्यात आल्याची माहिती महापौर विक्रांत गोजमगुंडे यांनी दिली.

विलगीकरण कक्षातील संशयिताचा मृत्यू

बीड : बीड जिल्ह्यात सध्या कोरोना रुग्णाची संख्या 31 वर गेली आहे 38 पैकी 6 पुण्याला वर्ग केले आहेत तर 1 बरा होऊन घरी गेला आहे तर एकाचा मृत्यू झाला आहे,जिल्हा रुग्णालयातील विलगीकरण कक्षात दाखल करण्यात आलेल्या आष्टी तालुक्यातील एका संशयिताचा मृत्यू झाला. गुरुवारी रात्री त्याचे स्वॅबचे नमुने घेण्यात आले होते. त्यानंतर तासाभराने त्याचा मृत्यू झाला. या संशयितास इतर आजाराने ग्रासलेले होते. श्वास घेण्यास त्रास होत असल्याने त्यास बीड जिल्हा रुग्णालयातील विलगीकरण कक्षात दाखल करण्यात आल्यानंतर त्यांचा मृत्यू झाला.या रुगणाचा अहवाल निगेटिव्ह आला आहे

परभणीत ४६ पोलिसांचे अहवाल निगेटिव्ह

परभणी : करोनाच्या पार्श्‍वभूमीवर संबंधित पोलिस उपविभागाच्या वतीने जिल्ह्यात सात ठिकाणी आयोजित केलेल्या आरोग्य शिबिरात १७६ पोलिस अधिकारी, कर्मचाऱ्यांचे स्वॅब घेण्यात आले होते. त्यापैकी ४६ अधिकारी व कर्मचाऱ्यांचे स्वॅब निगेटिव्ह आले आहेत. मात्र, अजूनही १३० अधिकारी, कर्मचाऱ्यांच्या स्वॅबचा अहवाल प्रलंबीत आहे.

Leave a Reply

Your email address will not be published. Required fields are marked *


error: Content is protected !!