परळी मतदारसंघातील घाट नांदूरगावात मतदान केंद्रात तोडफोड

विधानसभा निवडणुकीसाठी राज्यात सर्वत्र शांतेत मतदान सुरू आहे. पण बीड जिल्ह्यात मतदानाला गालबोट लागलं आहे. परळी मतदारसंघातील घाट नांदूरगावात मतदान केंद्रात तोडफोड करण्यात आल्याची घटना घडली आहे.जिल्हाधिकारी यांनी याबाबत कडक कारवाई करण्याचे आदेश दिले आहेत

हल्लेखोरांनी ईव्हीएम मशीन फोडले आहे. त्यामुळे मतदान प्रक्रिया ठप्प झाली आहे. 3 बूथवर तोडफोड झाली आहे. राष्ट्रवादीचे (शरद पवार )नेते माधव जाधव यांना मारहाण केल्याच्या निषेधार्थ कार्यकर्ते आक्रमक झाले आहे. त्यामुळे मतदान प्रक्रिया थांबवली आहे. बन्सी शिरसाट या कार्यकर्त्याची गाडी सुद्धा फोडली आहे.

दरम्यान, आज सकाळी याच मतदारसंघात शरद पवारांच्या राष्ट्रवादीच्या नेत्याला बेदम मारहाण करण्यात आली होती. मारहाणीनंतर कार्यकर्त्यांनी धनंजय मुंडे यांच्या नावाच्या घोषणा दिल्या होत्या. या घटनेचा व्हिडिओ देखील व्हायरल होत आहे.

बीडच्या परळी मतदारसंघात बोगस मतदान होत असल्याची माहिती शरद पवारांच्या राष्ट्रवादीच्या नेत्याला मिळाली होती. यानंतर शरद पवार गटाचे नेते माधव जाधव हे परळी मतदारसंघात बोगस मतदान रोखण्यासाठी गेले होते. मात्र माधव जाधव यांना मारहाण करण्यात आली होती. चार ते पाच जणांनी जाधव यांना मारहाण केली होती.

या घटनेनंतर पोलीस प्रशासनातील वरिष्ठ अधिकारी घटनास्थळी दाखल झाले आहेत. नांदुरघाट मधील तीन आणि चोथेवाडी आणि मुरंबी गावात देखील मतदान केंद्रावर तोडफोड करण्यात आले असल्याची माहिती पोलीस उपविभागीय अधिकारी अनिल चोरमले यांनी दिली. तसंच परिस्थिती नियंत्रणात असून धुडगूस घालणाऱ्यांना अटक केली जाईल,असं देखील सांगितलं.

मतदारांनो मतदान करून लोकशाही बळकट करा