बीड जिल्ह्यात पावसाचा कहर;कुंडलिका,बिंदुसरा,सिंदफना,मांजरा,नद्यांना पूर

बीड जिल्ह्यात पावसाचा कहर सुरू आहे. जिल्ह्यातील बहुतांश भागात शुक्रवारी मध्यरात्री पासून जोरदार पाऊस कोसळत आहे. अनेक नद्यांना पुन्हा पूर आला असून रस्ते, मार्ग पाण्याखाली गेले आहेत. त्यामुळे अनेक गावांचा संपर्क तुटला आहे. बिंदुसरा नदी तुडुंब भरून वाहत आहे. मांजरा, माजलगाव, सिंध्फणा प्रकल्पातून पुन्हा विसर्ग वाढवला आहे. मुसळधार पावसामुळे शहरात पाणी साचू लागले आहे.

जिल्ह्यातील अनेक भागात शुक्रवारी जोरदार पाऊस झाला. शनिवारी सकाळी पावसाचा जोर ओसरला असला तरी संतत धार सुरू आहे. त्यामुळे नद्यांना पूर आला आहे. कुंडलिका, बिंदुसरा, सिंदफना, मांजरा, नद्यांना पूर आला असून अनेक गावाचा संपर्क तुटला आहे. जिल्ह्यातील जनजीवन विस्कळित झाले आहे.

बीड शहरात मध्यरात्रीपासून सुरू असलेल्या मुसळधार पावसामुळे सगळीकडेच पाणीच पाणी झाल्याचे चित्र दिसून येत आहे शहरातील दोन ते अडीच हजार दुकानांमध्ये पाणी साचले असून धांडे नगर हा भाग पूर्ण पाण्यात आहे व्यावसायिक दृष्ट्या तळघरांमध्ये ज्या ज्या दुकानदारांनी दुकाना थाटल्या त्या दुकानांमध्ये देखील पाणी साचले असून जनजीवन विस्कळीत झाले आहे

बिंदुसरा नदीला संरक्षित भिंतीची गरज
शहरातून वाहणाऱ्या बिंदुसरा नदीच्या पात्रात मोठ्या प्रमाणात अतिक्रमणे झाल्यामुळे नदीचे पात्र कमी झाले आहे असे असताना बिंदुसरा नदीच्या पात्रात ज्या ज्या ठिकाणी पुराचा धोका आहे त्या त्या ठिकाणी संरक्षित भिंतीची गरज निर्माण झाली आहे यापूर्वी बांधण्यात आलेली भिंत ही दीर्घकाळ टिकेलच याची शाश्वती नाही त्यामुळे हजारो नागरिकांचे प्राण वाचवायचे असतील तर संरक्षित भिंत आवश्यक आहे याकडे स्थानिक लोकप्रतिनिधी आणि प्रशासनाने त्वरित लक्ष देणे गरजेचे झाले आहे

दरम्यान, आता मोठ्या प्रकल्पातून पाण्याचा विसर्ग वाढवण्यात आला आहे. मांजरा, माजलगाव, प्रकल्पातून विसर्ग सुरू केला आहे. प्रशासनाने नदीकाठच्या नागरिकांना सतर्कतेचा इशारा दिला आहे. धारूर तालुक्यातील गांवदरा गावात जाणाऱ्या मुख्य रस्त्यावर असलेला पूल सततच्या मुसळधार पावसाने वाहून गेल्याने अर्ध्या गावाचा संपर्क तुटला आहे.

बीड जिल्ह्यातील तब्बल अठरा महसूल मंडलात रात्री अतिवृष्टी झाली आहे. यात बीड तालुक्यातील बीड 73.8 मीमी, पाली 82.3, पेंडगाव 73.8, मांजरसुंबा 66.3, पाटोदा तालुक्यातील पाटोदा 71.5, दासखेड 86.0, थेरला 114.5, माजलगाव तालुक्यातील नित्रुड 70.0, अंबाजोगाई तालुक्यातील घाटनांदुर 84.3, उजनी 73.8, केज तालुक्यातील केज 74.3, हनुमंत पिंपरी 77.3, होळ 77.5, परळी तालुक्यातील परळी 68.8, धर्मपुरी 73.8, नागापूर 73.0, धारूर तालुक्यातील धारूर 84.3, तेलगाव 85.0 मीमी एवढ्या पावसाची नोंद झाली आहे.