मुलीची छेडछाड आणि लैंगिक छळ प्रकरणी दोन खाजगी शिक्षकांवर पोस्को अंतर्गत गुन्हा दाखल

बीड/प्रतिनिधी
खाजगी कोचिंग क्लासेस मध्ये ‘नीट’ ची तयारी करणाऱ्या एका 17 वर्षीय मुलीची छेडछाड आणि लैंगिक छळ प्रकरणी दोन शिक्षकांवर पोस्को अंतर्गत बीडच्या शिवाजीनगर पोलीस ठाण्यात गुन्हा दाखल करण्यात आला आहे.

शिक्षकांवरच गुन्हा दाखल झाल्यानं शिक्षण क्षेत्रात मोठी खळबळ उडाली आहे. विजय पवार आणि प्रशांत खटावकर असे या दोन शिक्षकांचे नाव असून बीड शहरात हे दोघे जण खाजगी कोचिंग क्लासेस चालवतात. या दोघांकडून नीटची तयारी करणाऱ्या मुलीची छेड काढून क्लासेसच्या केबिनमध्ये लैंगिक छळ केला जात होता.घडलेला प्रकार मुलीने आपल्या मैत्रिणीला सांगितला.मात्र, शिक्षकांकडून होणारा त्रास असाह्य झाल्याने मुलीने हा संपूर्ण प्रकार आपल्या आई-वडिलांना सांगितला. मुलीच्या आईने शिवाजीनगर पोलिस ठाणे गाठले. मुलीच्या फिर्यादीवरून दोन्ही शिक्षकांवर पोस्को अंतर्गत गुन्हा नोंदविण्यात आला आहे. पोलीस याप्रकरणी अधिक तपास करत असून दोन्ही शिक्षक अद्याप फरार आहे.सदरील शिक्षकांना राजकीय आश्रय असल्याने ते असे कृत्य राजरोजपणे करत होते,या दोन्ही आरोपींना तात्काळ अटक न केल्यास पूर्ण जिल्ह्यातील पालकवर्ग रस्त्यावर उतरून आंदोलन करेल असा इशारा संतप्त पालकांनी दिला आहे