शिंदे गटाचं विलिनीकरण एकमेव पर्याय:अन्यथा अपात्रता अटळ

मुंबई: शिवसेनेचे वरिष्ठ नेते आणि नगरविकास मंत्री एकनाथ शिंदे यांनी बंडखोरी करत शिवसेना आणि महाविकास आघाडीला अडचणीत आणलं आहे. गेल्या चार दिवसांपासून शिंदे आणि समर्थक आमदारांचा मुक्काम गुवाहाटीत आहे. शिवसेना आणि शिंदे गट यांच्याकडून कायदेशीर आणि तांत्रिक मुद्द्यांवर बॅटिंग सुरू आहे. एकमेकांना नियमांच्या कचाट्यात अडकवण्याचे प्रयत्न सुरू आहेत.
माझ्यासोबत दोन तृतीयांश आमदार आहेत. त्यामुळे आमचा गट म्हणजेच शिवसेना असा दावा करत शिंदेंनी थेट पक्षावरच दावा केला. मात्र शिंदे गटाचा अभ्यास कमी पडत असल्याचं विधिमंडळाचे माजी प्रधान सचिव अनंत कळसे यांनी सांगितलं. एखाद्या राजकीय पक्षात आपल्या गटाचं विलिनीकरण करण्याचा एकमेव पर्याय शिंदे गटासमोर असल्याचं कळसे म्हणाले. शिंदेंनी त्यांचा गट विलीन न केल्यास त्यांच्यासोबतचे सगळे आमदार अपात्र ठरतील, असं कळसेंनी म्हटलं.

पक्षांतरबंदी कायदा अतिशय स्पष्ट आहे. या कायद्यातील तरतुदींनुसार, दोन-तृतीयांश आमदार एखाद्या पक्षातून फुटत असल्यास त्यांना स्वतंत्र गट करता येत नाही. त्यांना एखाद्या नोंदणीकृत पक्षात विलीन व्हावं लागेल. तसं न केल्यास ते अपात्र ठरतील, अशा शब्दांत कळसे यांनी नियम सांगितला.
माजी न्यायमूर्ती कोळसे पाटील यांनीदेखील हाच मुद्दा अधोरेखित केला. पक्षांतरबंदी कायद्यात झालेल्या सुधारणेनुसार, फूट पाडून तयार झालेल्या गटाला कोणतीही कायदेशीर वैधता नाही. त्यामुळे अशा गटासमोर एखाद्या राजकीय पक्षात विलीन होण्याचा पर्याय उरतो. स्वतंत्र गट स्थापन करण्याची तरतूद नसल्यानं आता विधानसभेच्या उपाध्यक्षांची भूमिका महत्त्वाची असेल, असं कोळसे पाटील यांनी सांगितलं.