सरपंच पतीकडून उपसरपंचाला बेदम मारहाण तर माजी सरपंचाकडून तरुणावर कोयत्याने वार

बीडच्या निपाणी टाकळी येथील ग्रामसभेत उपसरपंच लक्ष्मण चव्हाण यांनी बोगस काम करून बिलं उचलू नका, असे आवाहन केले होते. या ग्रामसभेनंतर तू ग्रामसभेत बोगस कामासंदर्भात कसा काय बोलला? असा जाब विचारत सरपंच पती भगवान राठोड, जयकोबा राठोड आणि इतर 4 ते 5 जणांकडून माजलगाव-परभणी या रस्त्यावर उपसरपंच चव्हाण यांना काठी दगडाच्या सहाय्याने मारहाण करण्यात आलीय. या मारहाणीत चव्हाण हे गंभीर जखमी झाले. तर जखमी उपसरपंचावर बीड जिल्हा रुग्णालयात सध्या उपचार सुरु असून या प्रकरणात अद्याप गुन्हा दाखल करण्यात आलेला नाही आहे. या मारहाणीचा व्हिडीओ सोशल मीडियावर व्हायरल होत आहे. आता पोलीस नेमकी काय कारवाई करणार हे पाहणं महत्वाचं ठरणार आहे. मात्र या निमित्याने बीड जिल्ह्यातील गुन्हेगारीचा मुद्दा पुन्हा ऐरणीवर आल्याचे बघायला मिळाले आहे.

माजी सरपंचाचा तरुणावर कोयत्याने वार, रुग्णालयात उपचार सुरु…..

बिड मध्ये चाललंय तरी काय? असा सवाल सातत्याने विचारण्यात येत आहे. कारण मारहाणीच्या घटना थांबण्याचं नाव घेत नाही आहेत. आता बीड तालुक्यातील साक्षाळ पिंपरी गावात माजी सरपंचाने तरुणावर कोयत्याने जीवघेणा हल्ला केल्याची घटना समोर आली आहे. शेत रस्त्याच्या वादातून हा हल्ला करण्यात आले आहे. या हल्ल्यात तरुण गंभीर जखमी झाला असून सध्या त्याच्यावर खासगी रुग्णालयात उपचार सुरु आहे. जखमी झालेल्या तरुणाचं नाव प्रकाश काशीद असं आहे.

बीड जिल्ह्यातील साक्षाळ पिंपरी गावात माजी सरपंच गोरख काशीद याने रस्त्याच्या वादातून प्रकाश काशिदच्या डोक्यावर कोयत्याने वार करून गंभीर जखमी केलं.प्रकाश काशिदला तात्काळ उपचारासाठी खाजगी रुग्णालयात दाखल करण्यात आलं असून त्याची प्रकृती चिंताजनक आहे. या झालेल्या हल्ल्यामुळे गावात
एकच खळबळ उडाली आहे. घटनेनंतर बीड ग्रामीण पोलीस ठाण्यात गोरख काशीद विरोधात गुन्हा दाखल करण्यात आलं आहे. पोलिसांनी माजी सरपंचाला अटक केली असून त्याला न्यायालयात हजर करण्यात आले आहे.

या संदर्भात बीड ग्रामीण पोलीस ठाण्याचे पोलीस निरीक्षक मारुती खेडकर यांनी माहिती दिली की, ‘साक्षाळ पिंपरी गावात झालेल्या हल्ल्याच्या घटनेची गंभीर दखल घेण्यात आली आहे. कोयत्याचा वापर करून केलेला हल्ला हा अत्यंत गंभीर प्रकार आहे. आरोपीविरोधात भारतीय दंड विधानाच्या संबंधित कलमांनुसार गुन्हा नोंदवण्यात आला आहे. पुढील तपास पोलीस करत असल्याचं समोर आलं आहे.

सेवानिवृत्त पोलीस अधिकाऱ्याला जबर मारहाण

बीडच्या माजलगाव तालुक्यातील लवूळ गावात सेवानिवृत्त पोलीस अधिकाऱ्याला अमानुषपणे मारहाण केल्याची धक्कादायक घटना समोर आली. किरकोळ बाराशे रुपयांच्या वादातून ऊसतोड मुकादम आणि त्याच्या साथीदारांनी एका शेतमजुराचे अपहरण केलं आणि त्याची सोडवणूक करण्यासाठी गेलेल्या राजाराम सिरसट या सेवानिवृत्त पोलीस अधिकाऱ्याला जबर मारहाण करण्यात आली.

बाराशे रुपयासाठी ऊसतोड कामगाराचे मुकादमाने अपहरण केल्याची माहिती मिळताच सालगड्याला वाचवण्यासाठी गेलेले सेवानिवृत्त पोलीस अधिकारी राजाराम सिरसट यांना ऊसतोड मुकादम आणि त्याच्या साथीदारानी बेदम मारहाण केल्याची घटना घडली. या घटनेमध्ये सेवानिवृत्त पोलीस अधिकारी राजाराम सिरसट हे गंभीर जखमी झाले असून त्यांच्यावर जिल्हा रुग्णालयात उपचार सुरू आहेत.

माजलगाव तालुक्यातील किट्टीआडगाव येथील रहिवासी असलेले सेवानिवृत्त पोलीस अधिकारी राजाराम सिरसट यांचा शेतगडी विश्वनाथ पंडितचे ऊसतोड मुकादम शेख राजू शेख बाबू रा. मंजरथ ता. माजलगाव जि.बीड याचे बाराशे रुपये देणे होते. या बाराशे रुपयांसाठी या मुकादमाने व त्याच्या साथीदारांनी शेतगड्याचे अपहरण केले. त्यानंतर त्याला मारहाण करायला सुरुवात केली. त्याने स्वतःचा बचाव करण्यासाठी शेत मालक राजाराम सिरसट यांना फोन करून मारहाण होत असल्याची माहिती दिली.

याची माहिती मिळताच सेवानिवृत्त राजाराम सिरसट यांनी संबंधित मुकादमाकडे फोनवरून विचारणा केली. तेव्हा त्यांनी दीड लाख रुपये द्या आणि शेतगड्याला घेऊन जा असे सांगितले. त्यामुळे राजाराम सिरसट यांनी दीड लाख रुपये दिल्यास तुम्ही माझ्या शेतगड्याला सोडणार का? असे विचारताच त्यांनी पैसे घेऊन या त्याला सोडतो असे सांगितले. त्यानंतर राजाराम सिरसट यांनी घरी जाऊन दीड लाख रुपये घेतले व मुकादमाने सांगितलेल्या ठिकाणी गेले.

यावेळी मुकादम शेख राजू शेख बाबू आणि त्याच्या साथीदारानी शेत गड्यासह राजाराम सिरसट यांन मारहाण केली. या मारहाणीत राजाराम सिरसट गंभीर जखमी झाले. या गंभीर जखमी अवस्थेत राजाराम सिरसट यांना जबरदस्ती मोटरसायकलवर बसवून माजलगाव तालुक्यातील ढोरगाव आणि लवूळ शिवारातील घनदाट असलेल्या जंगलात घेऊन जाऊन पुन्हा मारहाण करायला सुरुवात केली.

लाठ्या-काठ्या, धारदार शस्त्रं, अगदी रिव्हॉल्वरचा धाक दाखवत जंगलात नेऊन बेदम मारहाण करण्यात आली. इतकंच नव्हे तर दीड लाख रुपये लुटून त्यांच्या तोंडावर लघुशंका करून अमानुष वर्तनही करण्यात आलं. याची माहिती मिळताच सिरसट यांचा मुलगा त्याठिकाणी आला, मुलगा पोहोचताच आरोपी पळाले, मात्र एक आरोपी पकडण्यात पोलिसांना यश आलं. गंभीर जखमी अवस्थेत राजाराम सिरसट यांच्यावर जिल्हा रुग्णालयात उपचार सुरू आहेत. किरकोळ पैशासाठी झालेली ही क्रूर घटना संपूर्ण जिल्ह्याला हादरवून टाकणारी आहे.